大家有時間記得要睇曬佢，對你保養所有衫都有莫大幫助！
店主發現其實好多朋友仔都唔明洗衫原理，
所以明明好似都做足要求，但唔知點解都係洗壞衫，
出面亦都唔會教得你太多，同你講咁多。
呢度就教一教大家洗衫規則背後嘅概念︰
1. 關於入袋
一件衫要入袋原因有兩個︰
一、係驚勾爛其他衫，洗壞部機 / 被其他衫 或 被機勾爛
二、係變形
如果只係前者，個洗衣袋其實無太大講究，只要入到件衫落去，網孔唔好太疏，唔好比衫接觸到其他東西就可以。
而後者就較為複雜，大家要理解佢點解要入袋先，係因為想固定衣服型狀/大小，所以即係唔可以比佢係袋入面攤返開 / 可以擰黎擰去扭大扭細，如果你用一個大袋去洗，出現上述情況，就基本上同無入袋無分別了😭佢照樣會係袋入面自由發揮，更加會同其他衫擰作一團，件衫出黎就好大機會變曬樣。
（當然都仲要視乎厚薄，設計而定）
所以最安全做法就係張呢類衫放入立體厚內衣桶型袋入面！件衫入左去完全無可能攤返開之餘，桶型亦都令佢同其他衫好似一粒異物咁分開，無可能扭得埋一齊，店主平時見到某類衫感覺唔襟fing，就會塞落桶型袋度，一定實無問題！
*** 當然好厚好緊實，領口較細，衫腳唔係開衩嘅款，擺唔入桶型袋，可以用比件衫至少細一半嘅洗衣袋 ***
2. 手洗？可機洗？
到底手洗同機洗係咩意思？點解要手洗咁鬼煩？
大家有冇諗過 Machine wash 係咪真係點樣 Machine wash 都得？
一、手洗 — 天然蛋白質纖維！
即係羊毛，真絲呢類材質！我唔講咁多複雜野，其實即係同你頭髮係差唔多野黎，人嘅頭髮都係蛋白質組合，你可以諗下其實你個頭都係用手洗，你想像下如果頭髮可以拆落黎，掉入洗衣機用 800 轉去 fing 仲要唔要得？🤣你仲要晚晚落護髮素，得閒搞個焗油先keep到佢亮麗，你打理得差就又乾又柴又打kick，後面仲會積成餅野。
所以手洗個概念就係咁樣，你點對待頭髮，你就要用同等愛心去洗！你掉入去機洗就係會破壞佢地結構，或者洗壞變成一餅野解唔開。
二、機洗 — 人造纖維！
Polyester, Nylon, Acrylic 呢類就係常見羊毛，真絲代替品，當然佢都被用黎有做其他各式各樣嘅彈性衣物，例如 Yoga Pants 都會用。但我講左針織款先，佢地通常都會標話可以機洗 machine wash，但其實 machine wash 係無話過任你點洗唔嬲，你試下而家去買一件可機洗針織，就咁掉入機又黎個 800轉 1400轉，九成都係又鬆又變形， 下？！咁即係點又話 machine wash？
承返第一點，machine wash 多數只係話你知件衫 * * 唔係蛋白質 * * 所以唔會破壞結構，就只係咁，但從來無話唔會洗鬆唔會變形。
所以其實針織無論咩物料都好，就算佢係標榜係可機洗嘅美麗諾羊毛，都係要入返袋，咁上面教左大家點入袋，唔再多講！
3. 晾衫
其實晾衫都好緊要，濕水嘅衫嘅重量足以拉長拉鬆一件衫！
其實前面做啱曬，件衫都已經好安全，不過緊係唔好埋尾一步掛壞！
一般黎講，大部分衫都係正常衣架晾就可以！不過彈性款，針織款，其實都好易拉長拉闊，所以店主建議大家真係好錫衫的話，就起碼用兩個衣架晾，一個正常咁穿起件衫，衫袖搭返上頸位，另一個衣架就掛起個衫腳，分開個重量，唔好比個衫腳張成件衫連膊位向下拉長。
一啲大領口 / 一字肩、好難掛起，好墜好食重量嘅款就平放晾曬。市面都有針織專用嘅晾曬架，以下圖中呢種就萬無一失。
圖片來源︰Amazon ( https://www.amazon.ca/UtySty-Clothing-Collapsible-Household-Lingerie/dp/B0C4DMPR4W )
｜此篇重點｜
1. 任何針織如要機洗，要放入立體厚內衣桶型袋，或比衣物最少細一半的洗衣袋，以無法攤開及與其他衣物扭擰成一團為佳。
2. 羊毛、蠶絲等蛋白質纖維，需以洗頭一般柔和地手洗。而可機洗的針織/彈性款，只是不會洗壞，但還是會因不當的機洗方式而洗鬆。
3. 針織 / 彈性 / 好難掛起嘅款一律建議用兩個衣架，或者使用平放晾架。
**** 如真的需要機洗，最好使用柔洗模式，羊毛模式，真絲模式去清洗
**** 清洗羊毛、蠶絲等蛋白質纖維，請加入專用的洗劑！
