Blog

大家有時間記得要睇曬佢，對你保養所有衫都有莫大幫助！
店主發現其實好多朋友仔都唔明洗衫原理，
所以明明好似都做足要求，但唔知點解都係洗壞衫，
出面亦都唔會教得你太多，同你講咁多。

點解自己洗出黎啲衫皺過人？

好多朋友仔自己搬咗出黎住之後，都問店主，點解啲衫咁皺嘅？
甚至乎免燙款，人人洗出黎都真係免燙，點解自己洗唔出免燙嘅效果嘅？
其實有時可能你比人做多咗少少，有時又比人做少咗少少。

1. 乾衣機 / 代客洗衫
好多人可能屋企無露台晾衫，又唔想室內晾乾唔透，就買乾衣機 或者搵 Apartment 嘅代洗服務 (佢地會用乾衣機)。大家試諗下，堆衫機洗揈完脫完水，全部野炒埋一碟擰埋一堆，又點可能唔皺，係呢個時候你仲擺入乾衣機，就即係用呢個最皺嘅狀態去硬化佢，定型佢咁樣，咁梗係特別皺過人又難燙啦，真係免熨都變唔免熨呀！

2. 沒有使用柔順劑 (但店主都不建議使用)
有部分人洗衫會落柔順劑，所以佢地既衣物洗出黎特別易燙，可以當係護髮素咁樣嘅概念，殘留一層腊質令佢保持柔軟。只不過柔順劑其實唔係洗咩都適合，天然纖維會比佢破壞結構，可能本身買棉質係為透氣吸汗，但用完之後雖然易燙，但都同時失去呢個特性，殘留一層腊質令佢變得焗身又唔吸汗。而且有部分人都對呢種殘留衣物上嘅物質敏感，包括當中嘅香精，更加未必適合有寶寶嘅家庭使用。
客人需自己權衡利斃再決定是否使用，例如衣物質地，家中有冇過敏史，自己對件衫著出黎嘅工整度要求有幾高。

3. 擺洗衣機太耐唔晾
有時返到屋企真係又攰又懶，撻著個制洗完都仲係想碌多陣手機先再晾，但其實又係會令啲衫用一個皺嘅狀態壓實，令到你晾乾後更難燙。

4. 無擺入洗衫袋
乜唔係脆弱嘅質地先要入袋架咩？係嘅，不過如果你個件衫好易洗皺，例如 較薄身嘅100% Cotton，褶好放入洗衣袋減低摩擦同拉扯都可以令佢洗出黎少褶。

5. 脫水時間較長
同理，如果衣物摩擦同扭扯嘅時間愈長，咁皺嘅機會率都會愈高。

正確做法︰
機洗前，先張易皺衣物褶好入較細嘅洗衣袋，自己決定脫水時間、是否使用柔順劑 (再重申一次店主不建議使用)。
機洗後，立即取出，不要久放於機內 (有皺褶定型效果)，如有鈕扣，扣好所有鈕扣，大力揈直再自然晾曬 (乾衣會固定皺褶)。
咁樣就算起皺，都唔會皺得太離譜，之後燙嘅時候都會容易好多！